Im Fent Logo

Visibiliza la llengua

Con l'asesoramento científico - lingüístico de la SLA

Sociedat de linguistica aragonesa

Im Fent visibiliza la llengua

Im fent naixe en espíritu colaborativo dende la vision poética de visibilizar la llengua aragonesa, empeçant per la variedat ribagorçana, i en l’objetivo de facilitar la transmision del legau lingüístico de nuestros pares als nuestros fillos.

Entendem que la forma de transmitir ixe legau é fer servir la llengua d’una manera informal i de contino, i per ixo proposam acercar textos breus a través de la vestimenta i els objetos cotidianos (devantals, taçons, baberetas) i d’atras accions que visibilicen la llengua als llugars (cartells, camins, mapas turísticos, senyalizacions, etcétera).

Posam per devant el rigor lingüístico avalau per l’asesoramento de la Sociedat de Lingüística Aragonesa (SLA), mirant de fer pedagogia u alfabetizacion general en las convencions gráficas i la recuperacion de voces documentadas i que, desgraciadament, ya no se sienten. En relacion en cómo escribir la nuestra llengua hem triau como modelo de grafia la propuesta per la Sociedat de Lingüística Aragonesa, grafia que, en buena mida, responde a presupuestos etimológicos, pero que tamé recupera usos de la scripta medieval aragonesa, próximos als dels romances pirenaicos vecinos, l’occitano i el catalan.

Tenim una oblligacion histórica de dignificar la llengua i la millor forma de fer-lo mos pareix que é aceptar las regllas proposadas per profesionals que llevan anyos treballant desinteresadament, estudiant las variedaz vivas, analizant la documentacion medieval i observant las diferents solucions que se troban a atras llenguas romances.

Ixe enfoque mos fa treballar en colectivos impllicaus i representativos de la nuestra comunidat lingüística, intentant transmitir el mensage a la més de la gent de Ribagorça. Pero, a la llarga, mos agradaria que el proyecto medrase y pasase enta atras comarcas on l’aragonés conta con una variedat viva, promovent una coherencia i identificacion interna del sistema lingüístico.

Fes-te-ne socio

Si quiers fe-te socio u contactar en nusatros mos puez escribir un correu electrónico a esta dirección:

email Im Fent

info@imfent.org

© Im Fent | Diseño: TheArtFactory.es